如果有留意開電競嘅朋友，相信大家都會知道首屆奧運電競周下月底喺新加坡隆重舉行，屆時將會以線下形式舉行包括賽車、單車、跆拳道等多項虛擬比賽總決賽。賽會喺剛周末就公布熱爆全球嘅射擊遊戲《Fortnite》已獲得國際射擊聯盟認可，成為今屆比賽的第十個項目，為呢項體育電競界盛事錦上添花。

國際奧委會(IOC)早喺三月已經宣布首屆電競周嘅九個競賽項目，分別有單車、賽車、帆船、棒球、射箭、網球、跆拳道、國際象棋同舞蹈，邀請來自世界各地嘅電競高手獻技爭奪冠軍。而著名射擊遊戲《Fortnite》日前獲列入為比賽項目之一，唔好睇佢被歸類為「大逃殺」類遊戲，就以為係好血腥，其實佢都係一種走動畫風嘅射擊遊戲，玩家之間會互相建造建築，避開對手進攻，可以話係鬥智又鬥力。不過為咗貫徹體育元素，IOC都講明競賽重點會落係射擊方面，將會以邀請賽形式，安排十二名2023 Fortnite Champion Series玩家參賽，挑戰眾人嘅「槍法」能唔能夠順利命中目標，預期個玩法會同傳統射擊、射靶非常相似。

除咗增加競賽項目，IOC都公布咗奧運電競周嘅活動詳情，比賽會場會有免費體驗區，屆時會陳列棒球、板球、單車同賽車嘅虛擬體育遊戲，俾購票入場嘅群眾參與；同一時間，現場都會有多項經典電競遊戲《NBA2K23》、《Eleven Table Tennis》競賽，吸納普羅體育迷。比賽以外，賽會特意舉辦咗青年體驗營活動，三十名來自亞洲各地嘅14-17歲青少年，有機會參與包括《Gran Turismo》等遊戲嘅專業訓練，增加對電競嘅投入度，更有助促進身心健康、溝通技巧等。

比賽直播時間表：
6月23日(星期五)：射箭、單車、舞蹈、帆船
6月24日(星期六)：棒球、跆拳道、射擊、網球
6月25日(星期日)：賽車、國際象棋